الشاعر عبدالرحمن السالم

 



الله من قلبٍ همومه تكزّه
كزّ المهرّب مع دروب المناهيل

من فوق شاصٍ للأوجف القلب دزّه
حمله خطير وما مشى بالتماهيل

يضرب طمان القاع خوفه تقزّه
خوفه جنودٍ في يديهم درابيل

على الذي يملك بقلبي معزّه
أركىٰ على كبدي هموم وغرابيل

لاراح همٍ جاك الآخر يحزّه
ولايشرح الخاطر وساع المداهيل

لو جيت اسلي خاطري وآتنزّه
ماطاب لي ياخوك حلو المقاييل

يا أبو سعود القلب كنك تخزّه
يومك تجيب من الجزايل تماثيل

دنياك لويصفى بها الوقت حزّه
لابد من يومٍ تشوف التهاويل

مافيه عبدٍ من شقاها منزّه
حتى النبي قد شاف منها بهاذيل

وحذراك من ولد الردي لاتلزّه
يسمعك من قول الخباث المهابيل

اللي على لحوم الأوادم مجزّه
مافيه خير ولايدير المعاميل

عليك باللي لانخيته مفزّه
خطو أبلجٍ بالضيق يشفي المغاليل

الحر ماتشبه طبوعه بوزّه
الحر لامن ضاق عاف المطاويل

وصرح الموده بينكم لاتهزّه
ادمح خطاه ولايجي منك تقليل

واقبل سلامي والوفا والمعزّه
واحفظ جوابي يا كريم الرجاجيل




عبدالرحمن السالم
@ALSALEM_1000