• ×

10:49 مساءً , الخميس 18 رمضان 1445 / 28 مارس 2024

طال بعدك علي طال قصيدة الشاعر حسن بن فهد آل طلحاب العقيلي الخالدي

زيادة حجم الخط مسح إنقاص حجم الخط
ناصر العوشن قصيدة (طال بعدك علي طال )


ياليت عقلي مثل تخزين جوال
يعني بضغطة زر صفحه جديده
وامسح زمن ماضي به أحزان واهوال
وأبدى حياتن كل أبوها سعيده
لكن عقلي نايشة ضرب زلزال
خلى حلومي ضايعاتن بديده
الماضي الفايت بعيني كتمثال
وقعه على صدري كخبط الحديده
ذكرى تَحَوَّطْني كما ربطة احبال
لا واهني أهل القلوب البليده
بعض الخواطر ذكريات كما اجبال
ياليتها تطوى كطي الجريده
بعض الأماني كنها سحب وخيال
تمطر على جاش المَعَنَّى بريده
وبعض الأماني كالذرى تشحن الحال
ماترتجع لو هي عزومك شديده
لبيه يالي صال بالقلب ثم جال
لبى عيونك والله إنك فقيده
تسعين ليلة والقبر صار منزال
يشرق علي طيفك مكنك بعيده
ماغبت عنك تاركٍ كل الأشغال
واضم قبرك والظماير وقيده
ماهمني عاذل ولو قال ما قال
وش عرف الجاهل حياته رغيده
واليوم يابنتي نوينا بترحال
غصب علينا في الحياة العنيده
لو هو بكيفي كان ممنوع ومحال
وأبقى كحال اللي مَوَثَّق بقيده
ابغى العذر منك تَلَطَّفْ على البال
ودعتك الله والموادع ماريده
أي والله اللي طال بعدك علي طال
هذا قضاء ربي وحنا عبيده
ياجعل قبرك دايم الدوم في اظلال
والحمد لله عند ختم القصيده

الشاعر / حسن بن فهد آل طلحاب العقيلي الخالدي
1440/1/14
سناب / hfmtk

بواسطة : admin
 0  0  1.5K
التعليقات ( 0 )