مايجزع المخلوق والوقت شده

 ما يجزع المخلوق والوقت شده

وش فيك يا بندر وانا خوك محشوم

لا ما سعى الرجال محد يعده

بين العرب رجال يا خوك لو يوم

وان ما حصل بالوقت جزره ومده

ما صار ممدوحٍ ولا صار مذموم

مرة يشد الوقت ومرة نشده

ومرات يهزمنا ومرات مهزوم

والله يوفق والتوافيق عنده

والرزق من عند المخاليق معدوم

لا ما عطى الوهاب من مد يده

تقصر وربك لا عطى الخير مقسوم

ياخوي كانك تذرف الدمع رده

دمعك خطا والدمع في طيحته لوم

تصفا لك الدنيا من الوقت مده

ومن بعدها ياخوك ترقى بها غيوم

غيمٍ بخيل وغيم عينك توده

وغيم يا عله ما لفى اليوم والدوم

كم عاليٍ من وقت سالف ترده

وكم شي من لا شي تزهى به القوم

بندر ترى ياخوك هالوقت وحده

مايصنع ارجالٍ ولا يبدع سلوم