#ابو سيف الخالدي

الشاعر بلاش يا خلّي من الكوي والحرق

ترى حياتي كل ابوها حريقة

أسهر طوال الليل واسامر البرق

برقٍ يذكرني جبينك بريقه

لا والذي بأمره تجي الشمس من شرق

ما تختلف عن وقتها لو دقيقة

ولا والذي أرسل لنا سيّد الخلق

وهدى لدربه من يشاء وطريقه

اني بذلت لوصلكم كافة الطرق

وزودت من عندي لوصلك طريقة

طرقت قلبك يالغضي بالغلا طرق

وارسلت مرسول الغرام وفريقه

وعفت العيون السود والزهر والزرق

واخترت حبّك بين كل الخليقة

ولا شفت في وصلك مع عاشقك فرق

ما كنّ عاداتي بوصلك عريقة

في بحر حبّك مركبي يالغضي غرق

وفي شاطي أحلامك ظنوني غريقة

لكن مادام الدمّ يمشي مع العرق

والله ما يخلي عشيقٍ عشيقه

ابو سيف الخالدي
بانقور
١٤٣٨/٢/٧ هجري